Thla hnih a thangbo hnuah Rahul Gandhi a rawn kir ta

Congress Vice Presi­dent Rahul Gandhi chu thla hnih dawn a thangbo hnuah nimin khan Delhi-ah a rawn kir.

Rahul Gandhi hi Bud­get session ṭan hma, Feb­ruary 22 aṭang khan chawlh lain a thangbo a, ni 57 zet a thangho chhung hian a awmna chin hi puanzar a nih loh avang­in media lama pawh an inrinsiak nasa hman hle.

Nimin chawhma dar 11.15 khan Bangkok aṭangin Rahul Gandhi hi a rawn thleng a, a nu, Congress party president Sonia Gandhi leh a farnu, Priyanka-te'n a inah an lo hmuak a ni.

Rahul Gandhi a rawn haw dawn tih sawi anih avang hian Nilaini zan aṭang khan media mi tam tak chuan Tuhglaq Lane-a a inah tlaivarin an lo nghak a, nimin zing khan mipui tam tak an pungkhawm bawk. Pungkhawm zinga tam zawk hi Congress party worker an ni a, an hruaitu lo lawmna atan hian halmawite an hal.

Kum 44 mi, Rahul Gandhi hian Pathiannia sorkarin land acquistion bill a siam danglam duh lohna lantira loneitute kawngzawh huaihawt turah thu a sawi beisei a ni. Vawiin hian party hruaitu leh loneitute a kawm bawk ang.

Hun rei tak chawlh a lak chungchangah Congress party hruaitute zingah ngei pawh ṭha ti lo an awm a, Congress General Secretary Dig­vijaya Singh chuan Rahul hian chawlh lak a phu a, mahse a lak hun hi a dik chiah lo a ni, a ti. Par­ty hruaitu hlun leh Del­hi Chief Minister hlui, Sheila Dikshit-i pawh­in Rahul-a'n party a kaih­hruai danah zawhna lian tak tak a awm a, Sonia Gandh chu an party tana beiseina lian ber a la ni reng tih a sawi bawk.

Kum 2014 Lok Sabha inthlanpuiah khan Congress party a chet chhiat em avangin Rahul Gandhi hian sawisel a a tawk nasa hle a, hemi hnuah a awmna chin sawi loa hun rei tak a bikbo avangin party dangte'n beihna remchangah an hmang nasa hle.