Pakistan flag zar vangin Masarat leh Geelani thubuai siamsak

Jammu and Kashmir-a inlakhran duhtu pawl, Hurriyat hruaitu, Masarat Alam chuan Pakistan thlawptu, Syed Ali Shah Geelani lawmna atan Srinagar-a Lal Chowk-ah Paksitan hnam puanzar zar a, India dodalna thu a sawi avangin thubuai siamsak a ni a, Geelani pawh thubuai siamsak a ni bawk.

Syed Ali Shah Geelani hian Nilaini khan Delhi aṭangin Sri­nagar hi a pan a, Srinagar-ah han Hurriyat pawlte hian lo hmuakin India duhlohna lantirin kawngzawh an huaihawt nghal a ni. Geelani hian kum 2010 hnua public rally a neih lehna hmasa ber a ni. Kum 2010-a India laka lungawi lohna a lantir ṭum khan mi 100 chuangin an thihphah a ni.

Hurriyat hruaitu, Masarat hi thla hmasa khan Jammu and Kashmir Chief Minister Mufti Mohammad Sayeed chuan ṭangrual sorkar a siampui, BJP rawn loin jail aṭangin a chhuahtir a, hei hi BJP bakah party dangte pawhin nasa takin an sawisel.

Union Home Minister Rajnath Singh chuan Masarat-a'n Pakistan flag vai a, India dodalna hla a aupui chungchang hi sorkar lapui chuan a ngai thutak hle tih sawiin, J&K CM hnenah hian a ṭul anga hma la turin a hrilh.

Congress party chuan J&K-a PDP-BJP ṭangrual sorkar chu sawiselin, sorkar an siam tirhah India dodaltu chu jail aṭanga chhuah a ni chu an dem thu a sawi. Nilainia Srinagar-a thil thleng chu thil vanduaithlak tak a ni, a ti bawk.