Pakistan flag vaitu Masarat Alam man a ni
Jammu and Kashmir Police-te chuan India laka inlakhran duhtu pawl hruaitu, Masarat Alam chu nimin khan Pulwama district-a Tral khuaah an man.
J&K sorkarin Alam a man chhan hi central sorkar nawrna vang nia sawi a ni a, mahse state sorkar chuan BJP-in a nawr vanga man a ni lo tih a sawi. Deputy Chief Minister Nirmal
Singh chuan, "State sorkarin inlakhran duhte lakah na takin hma a la zel dawn a, Jammu and Kashmir leh India dodal zawnga chete chu a ngaizam mai mai dawn lo," a ti.
Alam hian Hurriyat hruaitu, Syed Ali Shah Geelani-a'n Srinagar-a rally a neih ṭumin amah lo lawmna atan Pakistan flag a lo vai a, hei vang hian man a ni.
Police-te chuan Srinagar-a Shaheedgunj police station-ah hruaiin, magistrate hnenah an hruai hnuah jail-ah an dah nghal a ni.
Ningani khan Alam leh Geelani-te lakah hian thubuai ziahluh a ni tawh a, Tral-a rally huaihawt an tum pawh khapin pawn chhuak thei loa hren nghal an ni.
Man a nih hma hian Alam chuan rally neih a tum chu Jammu and Kashmir sorkarin a hlawhtlin a hlau tih sawiin, hei vang hian a dang bet ta niin a sawi. State sorkar chuan Hurriyat program chu thlawp se a duh thu a sawi bawk.
BJP hruaitu Anand Singh chuan J&K sorkarin Alam a man chu tih tur dik tak a ti a ni tiin, India ramah Pakistan thlawpna thu aupui a, Pakistan hnam puanzar vai chu tih tur a ni lo, a ti. Sorkar chuan India ram humhalhna tur chu a dah pawimawh ber zel dawn tih a sawi.
Thla hmasa khan J&K-a PDP-BJP ṭangrual sorkara Chief Minister, Mufti Mohammad Sayeed chuan an thawhpui, BJP hriatpui lohin Alam hi jail aṭangin a chhuahtir a, hei hi eptu party-te bakah BJP ngei pawhin nasa takin an sawisel a ni.