SC-in Gandhi sawiselna ṭawngkam chhia hman a remti lo

Supreme Court chuan India Hnam Pa, Mahatma Gandhi chungchang sawiselna atana ṭawngkam mawilo leh chhe tak hman a remti lo tih a sawi.

Court chuan artist-te chuan an ngaihdan leh thlir dan sawichhuahna turin zalenna an nei a, mahse an zalenna neihte chu dik lo takin an hmang tur a ni lo, a ti.

Mi pawimawh takte sawisel leh fiamthu thawhna lam hawia lo hmante chu thil huatthlala a ni lo a, mahse an ropuina leh hlutna tichhe thei khawpa ṭawngkam bungraw mawilo leh chhe tak tak hman chu tih tur a ni lo, tiin court chuan a sawi. Hetiang tiluite chu Indian Penal Code Section 292 hnuaiah thiam loh chantir theih an ni a, kum hnih thleng lung in tantir theih a ni tih a sawi bawk.

Kum 1984-a Maratha poet Va­sant Dattaray Gurjar-a poem, 'Gan­dhi Mala Bhetla Hota' (I met Gandhi) ah chuan Mahatma Gan­dhi hi a thusawituah hmangin, ṭawngkam mawi lo tak tak a hmantir a ni. He poem publisher lakah hian thubuai thehluh a ni a, ani hian Supreme Court-ah a laka thubuai siam chu titawp tura ngenin petition a thehlut ve leh a ni. A petition chhanna atan court chuan hei hi a sawi ta a ni.