Rahul-a'n loneitute a hmu dawn

Hun rei tak chawlh a lak hnua rawn kir, Congress vice president Rahul Gandhi chuan vawiin hian loneitute meeting a neihpui dawn.

Chawhma dar 10-a loneitute meeting a neihpui turah Rahul Gandhi hi party hruaitu senior-te'n an ṭawiawm dawn a, UP, Haryana, Rajasthan, Punjab leh Madhya Pradesh-a loneitu pawl hrang hrang aiawhte a kawm ang.

Congress party chuan Pathianni hian Ramlila Ground-ah Kisaan Mazdoor rally a huaihawt dawn a, he rally hi BJP kaihhruai NDA sorkarin land acquisition bill a siam danglam duh lohna lantirna tur a ni a, he bill siam danglam hi eptu party hrang hrang bakah, NDA hnuaia BJP thawhpui party ṭhenkhat pawhin an dodal a ni. Eptute chuan bill siam danglam hi loneitute hamṭhatna tur ngaihthah a, mi hausa leh sumdawng liante duhsakna lam hawia siam danglam a ni, an ti. Rally-ah hian party president Sonia Gandhi bakah Rahul Gandhi pawh hian thu a sawi dawn a ni.

Rally zawh hnuah Rahul hian a Parliamentary constituency Amethi a tlawh nghal ang.

Congress hruaitu hlun, Digvijaya Singh chuan Rahul Gandhi lo kir leh hian an party-ah a ṭha zawnga inthlak dang­lamna a thlen dawn a ni, tiin, "Eng anga inthlak danglamna nge thlen a tum tih chu kan hre thuai ang," a ti.