PM-in Canada-ah Gurdwara leh Temple a tlawh
Canada rama cham mek, Prime Minister Narendra Modi chuan nimin khan Vancouver-ah gurdwara leh temple a tlawh a, Canada Prime Minister Stephen Harper-a'n a ṭawiawm.
Modi leh Harper-te hian Toronto aṭangin Vancouver an pan a, gurdwara-ah kalin ṭawngṭai inkhawmnaah an tel nghal. Gurdwara-a kalkhawmte hmaah thu sawiin, Canada rama Sikh awmte chu an hnathawh leh inpeknate avangin India pawhin a zah hle a ni, a ti.
Modi chuan Guru Nanak-a zirtirna te sawichhuakin, India-in zalenna a sual laia Sikh hnam pawimawhna leh an thawh nasat dante a sawichhuak a, Bhagat Singh hming pawh a sawilang bawk. Sikh-te chuan midang tana inpumpekna kawngah entawn tur ṭha tak an siam a ni, a ti.
Gurdwara aṭang hian Modi leh Harper-te hi Lakshmi Narayan Temple-ah an kal leh a, Hinduism kaltlanga midangte tana hnathawh pawimawhnate a sawi. Modi chuan Canada rama India mite chu fakin, Hindu sakhua chuan midangte tana thawk a ni tiin, hei hian mihring chauh ni lo, nungcha thlengin a huam tih a sawi.
PM chuan UN-in International Yoga Day atana June 21 a puan chungchang pawh a sawichhuak a, mihringte tana yoga ṭhat dante chu thehdarh turin India mite chu a chah bawk.
Modi-a'n Gurdwara leh Temple a tlawh lai hian pawn lamah lungawi lohna lantira pungkhawm eng emaw zat an awm. Mipui pungkhawmte hian kum 2002-a Gujarat-a Modi-a Chief Minister laia Hindu leh Muslim inkara intualvuakna rapthlak tak thleng chungchang an duh lohna thu ziakte kengin, Modi chu an ram aṭanga kir nghal tura an phutna thute an ziak.