Naxal bomb tihpuahah CRPF Commando 10 thi

Bihar-a Aurangabad district-ah Thawhṭanni zan khan Naxal helho bomb tihpuahah CRPF COBRA battalion-a commando 10 an thi.

Naxal te hian commando-te kalna turah hian lo changin bomb an lo kam a, bomb puah hnu hian Naxal hel leh sipaite hi an inkap zui a, hel pathum kahhlum an ni. An inkahna hmunah hian helhoin an tlanchhiatsan sila leh a mu eng emaw zat hmuh a ni.

Official-te chuan helho nena an inkahnaah sipai ṭhenkhatin hliam na tak an tawrh avangin thi zat pawh hi an la pung chho mai thei a, mahse inbiakpawhna lam a ṭhat loh avangin chanchin kimchang an hre thei rih lo niin an sawi.

Home Minister Rajnath Singh chuan CRPF commando-te beih an ni chu a dem thu leh, thi chhungte a tawrhpui thu a sawi a, Maoist helho laka beihletna kawngah Bihar sorkar chu a theih ang anga puih a tiam. Home Minister hian Bihar Chief Minister Nitish Kumar chu telephone-in a bia a, thil thlen dan te a zawt nghal a ni. Rajnath Singh hian CRPF Director General K Durga Prasad chu thil awmdan thlitlai tura Gaya-Aurangabad tlawh turin a hrilh nghal bawk.