Rahul Gandhi-an thupha chawi tum lo

Congress vice president Rahul Gandhi chuan Rahstriya Swayamsevak Sangh (RSS) chungchanga a thusawi danah thupha chawi a tum lo nia sawi a ni. RSS hian an pawl chungchang tihhmingchhiat tuma thusawiah Rahul chu puhin, a lakah hian thubuai an thehlut a ni.

Rahul Gandhi hian kum 2014-a Bihwandi, Maharashtra-a rally neihnaah, "Mahatma Gandhi thattu chu RSS mi a ni a, Sardar Patel leh Gandhi-te chu an dodal reng a ni" tiin a sawi nia report a ni.

RSS Bhiwandi unit secretary, Rajesh Kunte chuan Gandhi hian RSS tihmingchhiat a tum nia puhin, Maharashtra court-ah defamation case a thehlut a ni. Gandhi hian an pawl chungchang dik lo taka sawi bakah, BJP hruaitu ṭhenkhatin India rama computer laluttu nia an insawi chungchang pawh nuihzat taka a sawi thu an tarlang bawk.

Complaint thehluh a nih hnu hian magistrate court chuan Rahul Gandhi hi Court-a inlan turin kumin January 6 khan a ko a ni. Gandhi hian court-a amah kher inlan ngai lo tur leh, a laka complaint thehlut chu thaibo tura ngenna a thehlut a, mahse Bombay High Court court chuan hei hi a hnawlsak a, court thupek tihchhuah chungchang hi Supreme Court-a a appeal a phalsak thung.

Hemi hnu hian Rahul Gandhi chuan Supreme Court-ah a appeal a, mahse Judges Dipak Misra leh RF Nariman awmna bench chuan pawikhawihna thleng chungchangah a pawl hming anga puh ngawt theih a ni lo tih sawiin, Rahul Gandhi a thusawi chungchangah thupha a chawi loh chuan a thubuai chu a hmachhawn a ngai dawnniin an hrilh. Mahse Rahul Gandhi hian hian thupha chawi a tum lo nia sawi a ni.

Rahul Gandhi-a ukil, senior advocate Harin Raval chuan Punjab and Haryana High Court thutlukna siam leh sorkar record behchhanin he thu hi Gandhi hian a sawi a ni a ti a, RSS chu a hranpaa bei a nih loh thu a sawi. Mahse bench chuan Punjab and Haryana High Court hian Mahatma Gandhi thattu, Nathuram Godse chu RSS worker a ni tiin a sawi a, RSS-in Gandhi an that tia sawi nen chuan a awmzia a hrang daih a ni, a ti thung.