Karnataka minister lakah FIR thehlut dawn

Karnataka Deputy Superintendent of Police MK Ganapathy a intihlum chungchangah Bengaluru JMFC Court chuan police-te hnenah minister KJ George leh police official-te pahnih lakah FIR thehlut turin a hriattir. Court hriattirna tihchhuah a nih hnu hian George chuan minister a nihna aṭanga banna a thehlut nghal a ni.

MK Ganapathy-a fapa, Nehal Ganapathy chuan a pa thihdanah court-ah hian thubuai a thehlut a ni. A pa chu mahni intihhlum duhna nei khawpa nawr chep nia sawiin, hetianga titu minister leh police official pahnihte chu chhui chiang turin a ngen a ni.

Eptu party-te pawhin DySP intihhlum chungchangah hian George hi bang turin an lo nawr tawh a, police hotute pawh suspend turin an phut bawk.

Nehal hian court-a complaint a thehluhah, a pa hian a intihlum hma hian minsiter leh IPS official hmingte a sawilang tih a sawi. MK Ganapathy (51) hi July 7 khan Kodagu district- Madikeri-a a room-a ceiling fan-ah a inawkhlum a ni.