Dalit-ten lungawi lohna lantir

Gujarat-ah bawng humhalhtu intiten kar kalta khan Dalit mi pali chu bawngvun an kawl avangin, bawng tihlumah puhin an man a, car-ah phuarbetin na takin an sawisa. An sawisak lai video hi internet lamah an dah zui bawk a ni.

He thil thleng avanga hian lungawi lohna lantirin, Thawhṭanni khan Dalit hnam chuan kawng an zawh a, kawngzawhnaa tel mi pasarih-te chuan tur in-in intihhlum an tum a, mahse an chhan hman.

Kawngzawh hi Gujarat-a khawpui lian hrang hrangah huaihawt a ni a, Rajkot leh Jamnagar-ah chuan kawngzawhte hian state transport bus pahnih an hal a, Rajkot leh Porbander inkalpawhna kawngpui pawh darkar eng emaw zat dan a ni bawk.

Bawng tihhluma puha Dalit mite sawisak an nih dan hi chhui chiang turin state sorkar chuan Criminal Investigation Department a hriattir tawh a, kut tuarte enkawlna senso pawh state sorkar hian a tumsak dawn a ni.

Police-te chuan pawikhawihnaa inhnamhnawiha puh mi pakua an man tawh a, mipuite himna tura duty kengkawh zo loa puhin police pali, inspector pakhat telin hrem an ni bawk.