Sept 21-ah Delhi CM atan Atishi la lut dawn

Aam Aadmi Party(AAP) chuan nimin, Ningani khan Delhi Chief Minister thar tur Atishi leh a cabinet te chu September 21, 2024 ah rinawmna thu tiama lak luh an ni dawn tih a puang.

Delhi lieutenant governor VK Saxena chuan President hnenah CM thar lak luh hun tura rawtna hi thlenin, Arvind Kejriwal banna lehkha pawh a thawn nghal bawk.

Kejriwal chu Thawhlehni khan Delhi chief minister a nihna aṭangin a bang a, a thlaktu atana an party-in an thlan, Atishi hian sorkar thar hi a din dawn a ni. Atishi hi Congress hruaitu Sheila Dikshit leh BJP hruaitu Sushma Swaraj hnua Delhi-a hmeichhe Chief Minister ni leh thei hmasa ber a ni ang.

September 21-a Chief Minister atana lak luh a nih hnuah, Atishi hi Delhi Assembly-ah sorkarna siam turin thlawptu a ngah tawk em tih fiahna a hmachhawn a ngai dawn a, hemi atan hian AAP chuan September 26-27 ah session a ko nghal a ni.

Atishi hian Kejriwal kaihhruai sorkarah khan cabinet minister niin portfolio pawimawh 14 lai a chelh a, heng zingah hian finance, education, leh revenue te a tel. Jail-a Kejriwal a awm chhunga sorkar khaidingtu pawimawh tak a ni bawk. Atishi kaihhruai sorkar tharah hian Gopal Rai, Kailash Gahlot, Saurabh Bharadwaj leh Imran Hussain te chu council of minister-ah an la awm chhunzawm zel dawn tih AAP chuan a puang. Minister-ah hian Mukesh Ahlawat chu dah thar a ni bawk ang.