Kerala-ah Mpox vei hmuh chhuah a ni
Kerala-ah Mpox, monkeypox hri vei hmuh chhuah a ni ve leh ta. Nilaini khan Kerala state-ah he hri vei hi hmuh chhuah niin, enkawl tura khung hran nghal a ni.
Mpox vei hmuh chhuah hi kum 38 mi, Malappuram khua a ni a, UAE aṭanga rawn haw a nih thu state health minister Veena George chuan a sawi. Damlo hian a taksaah symptom te a rawn lan avangin a chhungte lak aṭang pawhin a inkhung hrang nghal a , a hnuah sorkar damdawiin, Manjeri Medical College-ah enkawl chhunzawm tura dah luh nghal a ni, a ti. Mipuite chu an taksaa symptom-te an nei a nih chuan Health Department hriattir vat turin a ngen.
Hemi hma hian tun hnaia Africa rama zin mi pakhat chu Delhi-ah Mpox a kai tih hmuh chhuah a lo ni tawh a, a dinhmun a ngaihtuahawm lo a, hri darh tur venna atan khung hran a ni bawk.
World Health Organisation (WHO) chuan Mpox hri darh zel vangin thla hmasa khan khawvel pum huapin public health emergency a lo puang tawh a. Mahse India rama hri kai an hmuhte hi WHO in emergency a puan phahna, virus 'Clade 1' an ni lo tih sorkar chuan a sawi. India mi Mpox veite hri kai hi chu 'Clade 2' a ni.
Sorkar laipui chuan Mpox hri chungchangah kar liam ta khan state leh union territory-te hnenah hriattirna pein, vantlang hriselna dinhmun ennawn a, health facility hrang hrangte chu senior official-ten enfiah vek turin a ti a ni. WHO in a tarlan anga Mpox leh a natna lanchhuah dante chu mipuite hriattir tura chahin, he hri kai tam ber chu mipa, kum 18-44 inkar an nih thu leh, an serh leh a hnaih lamahte thak angin a lang chhuak ṭhin tih a sawi. Hri inkaichhawnna awlsam chu mipat hmeichhiatna aṭangin leh, taksa intawk/insik aṭangin a nih thu
a tarlang.
Mpox hri hi a kaitu a zirin a lan chhuah hun a in ang lo a, kar hnih aṭanga kar thum chhungte pawh a awh thei a ni. A kai te hi rang taka enkawlin damdawi puihna hmangin an dampui leh thuai thei a, natna kaiin taksa insik tawnna hrang hrang hmangin an pudarh thei bawk. A lan chhuah dan tlangpuiah hian khawsik, thak, kut leh ke hmawr hik te niin official lam chuan an tarlang a ni.