J&K Assembly inthlan thawh khatna ralmuang taka neih a ni

Jammu and Kashmir-ah September 18, Nilaini khan kum 10 liam hnua a vawi khatna atan assembly inthlan neih a ni. Inthlan thawh khatnaah hian constituency 24-ah vote thlak a ni a, vote tla hi 61.13% a tling.

Helpawl leh rawlrala chetna thlen fona, Kashmir valley-a seat 16-ah chuan inthlan hmasa aiin vote thlak pawh an pung hle. Voter leh candidate-te pawhin kumina inthlan neih hian J&K huam chhungah danglamna nasa tak a thlen ngei an beisei tih an tilang a ni.

J&K Chief Electoral Officer PK Pole in a tarlan danin, inthlan thawh khatna neihna zingah Kishtwar ah vote tla ṭha berin 80.14% in vote an thlak a, a hniam ber na Pulwama ah vote 46.65% a tla. Pole chuan boruak muanawm tak hnuaiah inthlan hi neih a ni tih sawiin, vote thlak nawn ngaihna tur thil thleng a awm lo a ni, a ti

Chief Election Commissioner Raji Kumar chuan mipuiten vote thlak an ngai pawimawh hle a, hei hian mipui thlan sorkar an duh zia a ti lang a ni, a ti. Vote thlak tumte thui tak tak intlar a hmuh chuan mipui sorkar neihna tura rinna an neih thuk zia khawvel hmuhah an lantir niin a sawi.