Covid-19 vaccine dahṭhatna turin Cold chain point 29,000, deep freezer 41,000 hmang dawn

Sorkar laipui chuan Covid-19 vaccine peihfel a nih  hnuah a dahṭhat dan leh semchhuah dan tur a buaipui chho mek a, hemi atan hian kaihhruaina pawh a tichhuak tawh a ni. 

Union health ministry-a secretary Rajesh Bhushan chuan Covid-19 vaccine dahṭhatna atan hian cold chain point 29,000, walk-in coller 240, walk-in freezer 70, ice-line refrigerator 45,000, deep freezer 41,000 leh solar refrigerator 300 hman a ni dawn tih a sawi. 

Vaccine semchhuah dan tur chung chang ngaithuahin state leh union territory 36-a State Steering Committe leh State Task Force-te pawhin meeting an nei tawh a, district 633-a District Task Force-te pawhin meeting an nei tawh bawk. 

Medical officer, vaccinator officer, alter­native vaccinator officer, cold chain handler, data manager, ASHA coordinator te training neih dan tur pawh siam ni tawhin, physical training leh virtual/online platform hmanga training pawh ṭan a ni tawh.  National and State Training of Trainers (ToTs) workshop chu zawhfel a ni tawh bawk a ni. 

Bhushan chuan vaccine sem chhuah hunah hian nghawng ṭha lo pawh thleng thei a ni tih sawiin, kum tak tak chhunga immunisation programme lo kalpui tawhahte pawh vaccine lak hnuah naupang leh nu naupai laiah nghawng ṭha lo awm ṭhin pawh hriat a lo ni tawh ṭhin a ni, a ti. Hei vang hian hetiang hi Covid-19 vaccina­tion ṭan hnuah pawh thleng ve thei a ni tiin, hemi atan hian state leh UT-te pawh an inbuatsaih tel a ngai a ni, a ti. 

Covid-19 vaccine hi pek chhuah theih a nih hunah healthcare worker, frontline worker leh kum 50 chung lamte chu pek hmasak an ni dawn a, anni dawtah hian kum 50 hnuailam zinga natna benvawn neite dah pawimawh leh an ni ang. Vaccine pek chhuah thawh khatnaah hian mi vaibelchhe 30 dawn pek tum a ni.