Dalit sawisak chungchang House-ah buaipui chhunzawm

Gujarat state-a bawng talha puh an nih vanga Dalit mi pali nasa taka sawisak an nihchungchang chu nimin khan Rajya Sabha-ah sawiho a ni a, politician-ten inbeih nan an hmang nasa hle. Congress vice president Rahul Gandhi leh Delhi Chief Minister Arvind Kejriwal-te chuan pawikhawihna thlenna hmun, Una khua hi tlawh an tum.

Congress president Sonia Gandhi chuan nimin zinga an party MP-te meeting a neihpuinaah, kar kalta-a Una, Gujarat-a thil thleng chungchang hi sawichhuakin, Parliament-ah pawh sawichhuah ngei a tum tih a sawi. Prime Minister Narendra Modi-a kaihhruai sorkar chuan Adivasi, Dalit leh ramhnuaia eizawng
ṭhinte dikna chanvo te a laksak a ni tiin, Dalit leh hnam tlem zawkten beih an tawk fo chu a dem thu a sawi.

Gandhi chuan Jammu and Kashmir-a tualchhugn buaina thleng mek pawh pawi a tih thu sawiin, ṭhalaite ti thinur a, lungawi lohna lantira tharum hial thawh duhna an neih phahna chhan chu chhuichian a ngai a ni, a ti bawk.

Bawng talha puh vanga Dalit mi pali na taka sawisak an nih vang hian Gujarat state chhung hmun hrang hrangah lungawi lohna lantir a ni a, hmun ṭhenkhatah chuan buaina a chhuak. Thawhlehni khan Ahmedabad aṭanga km 400 vela hla, Amreli-ah mipui thinrimin police-te lunga an tawngnaah police pakhat a thi. Nimin khan Dalit pawl hrang hrang chuan state pumah nawrh an huaihawt chhunzawm a ni.

State Chief Minister Anandiben Patel chuan nimin khan Una khua hi tlawhin, bawng venghimtu tia invuah, 'Gau Rakshaks' miten an sawisak Dalit mite a hmu dawn a ni.

Congress vice president Rahul Gandhi pawhin vawiin hian Una a pan dawn a, Delhi CM Arvind Kejriwal chu naktukah a kal dawn bawk a ni.

Nimina Rajya Sabha inkhawmah eptu party-te chuan hnam tlem leh hnuai≠hnung zawkten beih an tawh fo chung≠changah BJP kaihhruai NDA sorkar chu mawhphurtuah puhin na takin an bei a, chairman ṭhutna bulah MP-te hi an kalkhawm avangin rorel inkhawm pawh minute 10 chhung atan tihtawp lailawk a ngaih phah. Rorel chhunzawm a nih leh hnuin Social Justice and Empowerment Minister Thawar Chand Gehlot chuan Dalit mite chunga pawikhawihna thleng chungchangah state sorkar chuan hma a la mek a, thil tisualtute chu hremna a pe ngei dawn a ni, a ti. State sorkar chuan kut tuar Dalit chhungkuate chu sum lama ṭanpuina pawh a pe niin a sawi bawk.

Gehlot chuan Una-a pawikhawihna thleng chungchangah FIR ziahluh a nih tawh thu sawiin, thil thlen dan kimchang chhui mek a ni a, thla hnih chhungin report thehluh a ni ang, a ti. He thil thleng chungchang politics lama inbeihna atana hmang lo turin MP-te a ngen.