Kanhaiya Kumar leh midang 21 registration tihsak duh lo

Jawaharlal Nehru University (JNU) chuan kumin January 9-a university campus-a ram dodal zawnga thu sawia puha thubuai siamsak, JNU Students Union President Kanhaiya Kumar leh zirlai dang 21-te chu semester thar atan registration a tihsak duh lo.

JNU registrar Pramod Kumar-an zirlai registration dansak 21-te hming a ziahna hi tihchhuah a ni a, an zingah hian Kanhaiya Kumar bakah, campus-a parliament beitu firfiak Afzal Guru puala hun hman a nih ṭuma ram dodal zawnga thu sawia puh dang, Umar Khalid leh Anirban Bhattacharya-te pawh an tel. An pathum hian man a ni tawh a, mahse bail-a chhuah mek an ni.

Registrar-in hming a tihchhuaha tel zirlaite chuan university thutluka siam chu court thupek palzutna a ni thu an sawi. An zinga tel, Ashutosh chuan, "High Court-in kan laka action la lo turin university hi a lo hriattir tawh a ni" a ti. Registration tihsak duh loh zinga mi, JNUSU Joint Secretary Surabh Sharma pawhin ram dodal zawnga chete a duh lohna a lantir avangin a ni pawhin hrem a tawh phah niin a sawi. Shamra hi RSS student wing, ABVP member a ni.