US Congress-in India leh China kaihhnawih Defence Police Bill an pawm

United States Cong­ress chuan US Dollar tluklehding­awm 740 hu Defence Policy Bill an pawm a, he bill hnuaiah hian India leh China inrina Line of Actual Control (LAC)-a China-in beihpui a thlak dodalna tur pawh a tel.

US House of Representa­tives leh Senate chuan Thawh­lehni khan National Defense Authorization Act (NDAA) an pawm a, hetah hian  Indian-American Congressman Raja Krishnamoorthi resolution language put luh, China-in India nen an inrinaa India dodal zawnga chet a lakna ṭhin tihtawpna tur pawh hi a tel a ni.

India leh China hi May thla aṭang khan Ladakh khaw chhak lama LAC-ah an inep tawh a, ṭum eng emaw zat hemi chungchangah hian ram pahnih hi an inbe tawh a, mahse rah ṭha a la chhuah hlei thei lo.

Raja Krishnamoorthi resolution put luh hi US president Donald Trump-a'n a hming a ziah hnan a nih chuan danah a chang dawn a ni.

Tharum thawhna hmanga beihpui thlak hi mamawh chhanna a ni ngai lo, hei hi  Line of Actual Control, China leh India daidangtua buaina awm chungchangah pawh hian a chiang hle, tiin Krishnamoorthi chuan a sawi.

"Ka resolution language NDAA-a telh a ni a, dana siam a nih hmang hian US sorkar chuan China hnenah India a tihbuaina chu a en liam mai dawn lo a ni tih chiang takin a lantir dawn a ni," a ti. US chuan a thawhpui ram India angte'n ramria inep chungchanga buaina an neihah hian a dinpui reng dawn a ni, a ti bawk.