Mayawati sawichhetu BJP hruaitu party nihna hlihsak

Uttar Pradesh state unit BJP vice president Dayashankar Singh chuan Bahujan Samaj Party (BSP) hotu lu ber, Mayawati chu nawhchizuar nen a khaikhin a, a thusawi avang hian BSP member-te chuan police station-ah FIR an thehlut.

An party hruaitu thusawi avang hian BJP hruaitu hlun leh Finance Minister Arun Jaitley chuan Parliament-ah pawi a tih thu pawh a sawichhuak a, "A thusawi dan hi a ṭha lo, ka dem takzet a, kan chhui chiang dawn a ni. I zahawmna hi ka ngaihlu a, kan thlawp tlat che a ni" tiin Mayawati pawh a hrilh tawh a ni.

Hemi hnu hian BJP chuan Uttar Pradesh BJP vice president a nihna aṭangin Singh hi ban a nih thu a sawi.

Dayashankar Singh hian Thawhlehni-a a thusawiah, "Mayawati hian inthlana chuh tumte hnenah ticket a hralh ṭhin a ni. Ṭum thum lai chief minister a ni tawh a, mahse heti chung hian cheng vaibelchhe khat pe thei chin hnenah ticket hi a pe
ṭhin. Tlai lamah cheng vaibelchhe hnih kengin a bulah kal se, inthlana chuh turin ticket a lo pe nghal ang. Mahse a hnuah midang, cheng vaibelchhe thum keng rawn kal se la, a hma chiaha ticket a lo pek tawh chu a thlauhthla leh nghal mai dawn a ni. A thiltih dan hi nawhchizuar chet dan ai pawhin a ṭha lo zawk a ni" a ti. Nasa taka sawisel a nih hnua Singh hian a thusawi avang hian thupha a chawi leh a ni.

Singh hi UP-a BJP vice president 15 zinga pakhat a ni a, nakkuma state assembly inthlan an neih tura an campaign-naah pawh party hmatheh zinga mi a ni.

Mayawati chuan BJP-in Rajya Sabha-ah ngaihdam an dilna chu chhangin, pasal a neih loh avangin India ram pum chu a chhungkua anga a ngaih thu a sawi. "Mi tupawhin unaunu tiin min sawi a, Parliament-ah pawh chutiang chuan min sawi mai
ṭhin. BJP hruaituin a unaunu leh a fanu a sawi dan hi hetiang hi a nih chuan, India ram hian engtikah mah BJP hi a ngaidam thei lo ang" a ti. Eptu party dangte pawhin Mayawati thlavang hi hauhin, BJP hruaitu thusawi dan chu an dem thu an sawi.

Nimin khan BSP worker-te chuan Lucknow-a Hazratganj biala Ambekdar-a lim bulah lungawi lohna lantirin, Dayashankar Singh chu an party hotu chungchang mawi lo taka a sawi avangin man tura an phut thu an sawi. District hrang hranga an party worker-te pawh state khawpuiah hian lungawi lohna lantir tura kal turin an hrilh tih an sawi a, district hrang hrang aṭangin party worker-te an kalkhawm a ni. BSP worker te nawrh huaihawt vang hian khawpui chhunga traffic pawh a buai phah hle.

Uttar Pradesh-a Samajwadi Party (SP) sorkar chuan FIR thehlut behchhan hian Singh-a chungah action lak a nih tur thu a sawi. Mahse Nilaini zana a chenna ina police kalte chuan Singh hi a inah an hmu lo niin Deputy Superintendent of Polic KC Tyagi chuan a sawi.