Gujarat-ah Dalit-ten nawrh huaihawt chhunzawm

Gujarat-a bawng humhalhtu intiten bawng talha puha Dalit mi pasarih sawisa a, an sawisak lai thlalak internet lama an thehdarh zui avanga lungawi lohna lantirin Dalit pawl hrang hrangten nawrh an huaihawt chhunzawm zel.

Gir-Somnath district-a Una khuaa Dalit mi pasarih sawisak tawkte hian bawng an talh loh thu leh, bawng thi vun an la zawk mai niin an sawi. Mahse bawng humhalhtu intite hian manin, an thawmhnaw an hlihsak hnuah motor-ah phuarin an sawisa zui a ni. An sawisak lai hian mi eng emaw zatin en mah se, tumahin Dalit mite hi chhan an tum lo.

Gujarat state chhung hmun hrang hrangah Dalit ho hian lungawi lohna an lantir a, nawrh an huaihawtna hmunah hian mi 17 te chuan intihhlum an tum a, mahse chhan hman an ni. Hemi hma hian fact-finding team chuan Dalit mi kut tuarte hi darkar eng emaw zat na taka sawisak an ni a, hemi chhung hian police-ten engmah an ti lo niin a sawi.

Gujarat state sorkar chuan pawikhawihna thlen dan hi CID Crime branch a chhui tir a, special designated court siamin ni 60 chhunga chargesheet thehlut turin a ti bawk.

Congress vice president Rahul Gandhi chuan nimin khan kut tuartu Dalit mite chenna, Una khuaah kalin hliam tuarte hi a tlawh a, an party-in a puih tur thu a hrilh. Delhi Chief Minister Arvind Kejriwal pawhin sawisak tawkte hmu tur hian vawiinah Gujarat hi a pan dawn bawk.

Gujarat Chief Minister Anandiben Patel pawhin sawisak tawkte hi a hmu tawh a, theihtawpa ṭanpui a tiam bawk a ni.