Kashmir-ah chanchinbu tichhuak ṭan

Kashmir Valley-a tualchhung buaina thleng avanga thuneituten chanchinbu tih≠chhuah an khap hnuah, nimin aṭang khan chhuah chhunzawm leh a ni ta.

Nilaini khan chanchinbu editor hrang hrangte chuan Chief Minister Mehbooba Mufti-i an hmu a, CM hian thuneituten chanchinbu tihchhuah an khapsak avanga pawi a tih thu a hrilh. Chanchinbu mite harsatna siamsak an ni chu pawi a tih thu sawii, Mufti chuan hetiang thil hi a thlen nawn tawh loh tur thu pawh a sawi a ni.

Tualchhung buaina thlen hnu hian thuneitute chuan Kashmir Valley huam chhunga chanchinbute tichhuak lo turin an hriattir a, printing press te chu sorkar mi tirhten enfiahin an hnathawh an tihtawp tir a ni. Mahse hetianga chanchinbu thlenga khuahkhirh a nih avang hian state sorkar pawhin sawi≠sel a tawh phah nasa hle. Ramchhunga journalist pawl hrang hrang pawhin Jammu and Kashmir sorkar thiltih dan hi an sawisel a ni.

Hizbul Mujahideen firfiak pawl commander Burhan Wani kahhlum a nih vanga Kashmir Valley-ah buaina chhuakah hian civil mi 44 in nunna an chan tawh a, mipui lungawi lo pungkhawm leh security force-te inkara buaina thleng vangin mi 1900 chuangin hliam an tuar bawk. Nimin thleng khan sorkar chuan district tam zawkah curfew a la puan chhunzawm zel.

CM Mufti-i hian nimin khan Kashmir Valley boruak chungchang ngaihtuahin all-party meeting a ko a, mahse meeting hi CM hlui Omar Abdullah kaihhruai National Conference chuan a boycott. NC hian buaina nasa tak a chhuah laia sorkar chet danah chuan an state-in hruaitu ṭha an neih loh zia a tilang a ni, a ti.

Meeting-ah hian hun rei tak curfew puan a nih tawh avanga mipuite harsatna tihziaawm nan tlai lamah an mamawh lamkhawmna hun siam a, curfew thlahdul an rel. Hetihlai hian inlakhran duhtu pawl chuan vawiin aṭanga karleh Thawhṭanni thleng nawrh huaihawt an tum thung.