Loneitute nawrh vangin nitin Rs vbc 3,500 hloh

Sorkar laipuiin farm law thar pathum a siam duh lohna lantira ram chhunga loneitu pawl hrang hrangte nawrh huaihawt chuan supply chain a nghawng nasa tawh hle. Kawng­pui te dan a nih avangin thil sem chhuahna lam pawh a nghawng na hle a, nawrh huaihawt vangin nitin cheng vaibelchhe 3,000 - 3,500  zel hloh ang a nih thu Assocham chuan a tarlang. 

Assocham general secre­tary Deepak Sood chuan farm law chungchanga loneitu pawl leh sorkar laipui inkara inhriatthiam lohna awm mek chu chinfel thuai a nih loh chuan, Covid-19 hri leng avanga ram economy dinhmun tlahniam chu a nghawng chhe leh zual dawn a ni, a ti. 

"Punjab, Haryana, Himachal Pradesh leh Jammu and Kashmir-te economy belhkhawm hi Rs vaibelchhe nuai 18 a ni. Mahse loneitute nawrh huaihawt leh kawng dan avangin hna tam tak thawh theih lohin a awm. 

Export market lama tha thawhtu pawimawh - textile, auto component, bicycle, sports goods industry-te chuan order te an pechhuak ṭha thei dawn lo a, hei hian ram dang aṭanga min dawr­tute nena kan inkar thlengin a tichhe thei dawn a ni," tiin Assocham president Niranjuan Hiranandan chuan a sawi.