Parliament video thehdarhtu AAP MP hrem an phut

Nimina Parliament in hnih rorel inkhawmah MP-te chuan social media lama Parliament building chhung video thehdarhtu, Aam Aadmi Party (AAP) MP Bhagwant Mann lakah action lak an phut.

Lok Sabha MP, Bhagwant Mann hian rorel inkhawmnaa tel tura a kalna, a chenna in
aṭanga Parliament House chhung thla video-a a lak chu internet-ah a dah chhuak a ni. A video-ah hian Parliament House chhung, security-te awmna hrang hrangte a kal≠tlang laite a tihlan tel vek avangin hei hi dan kalh a nih bakah, parliament himna a tiderthawng thei niin an sawi.

Lok Sabha Speaker Sumitra Mahajan chuan MP hi koin, "Mi 13-ten Parliament himna vawnghim tur hian an nunna an lo hlan tawh a ni. He thil hi ngaihthah mai chi a ni lo a, a ṭul angin action pawh lak ngei a ni" tiin a hrilh a, rorel inkhawm hi Thawhṭanni-a chhunzawm turin a titawp nghal a ni.

Rajya Sabha-ah pawh rorellai BJP MP-te chuan Mann hi hrem ngei turin an phut bawk a, Deputy chairman PJ Kurien chuan thil lian tham tak a ni tiin, sorkar pawhin a ṭul angin action a lak tur thu a sawi. Member-te chuan hemi chungchang hi sawiho an duh a nih chuan, resolution an siam a ngai a ni, a ti.

Minister of State for parliamentary affairs, Mukhtar Abbas Naqvi chuan Parliament building security awm dante firfiakte hmuh theiha a dah chhuah avangin MP Mann hi National Security Act hnuaiah hrem ngei a phut tih a sawi. Parliament House chhung video a dahchhuahah hian security check awmna hmun te, security forceo-te duty na lai leh, House chhung awmdante a tihlan vek avangin Parliament design neih tuma beitu, firfiakte a pui nasa hle a ni, tiin a sawi.