Kanhaiya leh midang 20-te registration tih phalsak

Jawaharlal Nehru University (JNU) chuan February 9-a campus chhunga Parliament beitu, firfiak Afzal Guru puala inkhawm buatsaiha inhnamhnawiha puh, JNU zirlai pawl hruaitu Kanhaiya Kumar leh zirlai dang 20-te chu registration an tih a phalsak leh ta.

JNU hian zirlai 21-te hi ram dodal zawnga thiltih leh thusawinaa inhnamhnawiha puh an nih vang hian an university-a registration tih khapsak an nih thu a lo chhuah tawh a, mahse thupek a tihchhuah hnu nithumah a thupek hi a sut leh ta a ni.

Kanhaiya Kumar bakah zirlai hruaitu dang, Umar Khalid leh Anirban Bhattacharya-te chu Afzal Guru puala campus chhunga inkhawm buatsaiha India dodalna thu aupuia puhin thubuai siamsak an ni tawh a, man niin tunah hian bail-a chhuahtir mek an ni.

June thlak han Delhi High Court chuan campus-a inkhawm buatsaih kaihhnawihah hian zirlaite hremna pek chu a lo dan sak tawh a ni. Hemi hnua university chuan thil awmdan chhui chiang turin member pali awmna committee a din leh a ni. Official-te chuan committee thutlukna siam an nghah avangin university chuan zirlai 21-te registration tih tur hi a lo dansak niin an sawi.

University-in zirlai registration tih a khapsakte hming a tihchhuah hnu hian zirlaite chuan lungawi lohna an lantir a, court thupek palzutna niin an sawi a ni.