Gujarat-ah Kejriwal a zin

Delhi Chief Minister Arvind Kejriwal-a chu nimin khan Gujarat-ah kalin, bawng talha puh an nih avanga sawisak tuartu, Dalit mite a tlawh.

Una-a Civil Hospital-a kut tuartu Dalit mi pali la awmte chu tlawhin, Kejriwal chuan Gujarat sorkar chu pawikhawihna thleng chungchangah hma la ṭha tawk loah a puh. Kejriwal chuan Dalit mite kutthlaktute hian an tih nawn ngam tawh lohna turin hrem an tuar tur a ni, a ti. Hemirual hian thuneitu sang lam aṭanga thu an hmuh avangin state sorkar chu a hun takah a che ngam lo niin a sawi bawk.

Kejriwal chuan Dalit mi, kut tuartute chu mipui vantlang hmuh lai ngeiin sawisak an ni a, thuneitute awm lai ngeia hetiang thil a thleng thei hi thuneitu sang zawk lamin pawikhawihtute an thlawp vang a ni, a ti. Gujarat sorkar chu Dalit mite thlawp loah a puh.

Congress vice president Rahul Gandhi pawhin Una district hi tlawhin, Dalit mi kut tuarte hi alo tlawh tawh bawk a ni.