IAF AN-32 awmna chin hriat a la ni lo

Indian Air Force thlawh-theihna, AN-32 chu kar kalta Zirtawpni khan Chennai
aṭanga Port Blair pana a thlawh laiin chin hriat lohin a bo a, nimin thleng khan a chin hriat a la ni lo.

AN-32 transport plane-ah hian mi 29 an chuang a, zing dar 8.30 ah Chennai bula Tambaram air base aṭanga thlawk chhuakin, Port Blair-ah dar 11.45-a ṭum tur a ni. Mahse a thlawhchhuah aṭanga rei vak lo, Chennai khawchhak lam km 280 vela hlaa a awm lai, zing dar 9.12-ah biak pawh theih a ni ta lo a ni. Radio hmanga an biak theih hnuhnun ber chu a thlawhchhuah aṭanga minute 16, zing dar 8.46 niin, pilot chuan thil engkim a ṭhat thu a sawi.

Thlawhtheihna hi zawn chhunzawm zel a ni a, Bay of Bengal-ah Navy leh Coast Guard lawnglian 18 hmanga zawn a ni a, hei bakah hian aircraft pariat hman a ni bawk.

Defence Minister Manohar Parrikar pawhin Chennai hi a pan tawh a, Inrinni khan thlawhtheihna hmangin Bay of Bengal tuipui an enkual a ni.

Chin hriat loha bo, AN-32 ah hian thawktu paruk bakah sipai bakah an chhungte, civil mi pariat leh thawktu paruk an chuang.

Indian space agency chuan thlawhtheihna zawn nan hian Radar Imaging Satellite (RISAT) a hmang dawn niin Indian Space Research Organisation (ISRO) Chairman AS Kiran Kumar chuan a sawi.

Darkar 48 zawn a nih hnuah a chin hriat a la nih loh avangin airforce thunietute chuan Inrinni zan khan AN-32 aircraft bo chungchangah Tamil Nadu police-ah complaint an thehlut.