Rajnath Singh-an high level security meeting ko

Union Home Minister Rajnath Singh chuan Kashmir Valley-a tualchhung buaina thleng mek chung-chang ngaihtuahin nimin khan Jammu and Kashmir khawpui, Srinagar-ah high level security meeting a ko.

Rajnath Singh hian ni hnih cham turin J&K hi tlawh a, buaina chhuahna hmun Kashmir Valley-a Anantnag district pawh a tlawh a, nimin tlai khan Delhi lamah a kir leh nghal a ni.

Nimina security meeting hi Srinagar-a Nehru Guest House-ah neih a ni. Chief Minister Mehmooba Mufti, senior bureaucrats, police official bakah state leh central intelligence agency hotute bakah para-military force official-te pawh an tel.

Minister hian political party hrang hrang aiawhte a hmu bawk a, an zingah hian chief minister hlui Omar Abdullah kaihhruai National Conference (NC) aiawh leh rorellai, People’s Democratic Party (PDP) aiawhte pawh an tel. Mahse state Congress hotu bakah civil society group leh traders organisation aiawhte chuan minister hi an hmu duh lo.

Tualchhung buaina chhuak vang hian Kashmir Valley-a district 10-ah curfew puan a ni a, mahse nimin zing khan disctrict pali-a chuan curfew hi hlih a ni.

Security force-ten Hizbul Mujahideen commander Burhan Wani an kahhlum avanga mipui leh security force-te inkara buaina chhuak vang hian mi 45 an thi tawh a, mi dang 3,400 chuangin hliam an tuar bawk. Security force-te kut tuara civil mi eng emaw zat an thih vang hian inlakhran duhtu pawlte chuan vawiin hian lungawi lohna lantirin Anantnag-ah kawngzawh huaihawt an tum a, mahse hei hian buaina nasa zawk a chawhchhuah venthawn thilah security force-te chuan dan an tum.