Hmeichhia vau vangin AAP MLA man

Delhi-a rorellai, Aam Aadmi Party (AAP) MLA Amanatullah Khan chu hmeichhe pakhat a vau avangin Delhi Police-ten an man.

July 20 khan hmeichhe pakhat, kum 35 mi chuan MLA Amanatullah Khan hian a vau nia sawiin south Delhi-a Jamia Nagar police station-ah FIR a thehlut a, police-te chuan Indian Penal Code (IPC) section 506(punishment for criminal intimidation) leh 509 (word, gesture or act intended to insult the modesty of a woman) hnuaiah thubuai an ziaklut a ni.

Thubuai thehluttu hian July 10 khan MLA chenna, South Delhi-a Batla House-ah kalin, an awmna biala electric supply ṭha lo chungchang a complain niin a sawi. MLA inah hian a ṭhuihruai pakhat chuan na taka lo hauin, thah leh pawngsualah hial a lo vau a, hei hi MLA Khan thupek anga ti a nih thu pawh a sawi niin a tarlang.

Nimin khan Bihar-ah BJP MLC Tunna Pandey chu rel-ah hmeichhe naupang laka mawi lo taka a chet avangin Government Railway Police-ten an man. BJP MLC Siwan Bharatiya hian hmeichhe naupang hi rel-ah a muthilh laiin khawih a tum a, mahse naupang hi rak chhuakin a nu leh pate hian FIR an thehlut a, MLC hi man nghal a nih thu Railway Police-te chuan an sawi.

Pandey chuan an puhna chu thu dik lo niin a sawi thung a, a phone charger lakchhuah tumin hmeichhe naupang mutna bula a bag a lak thu leh, hmeichhe naupang hi a khawi loh thu a sawi.