Parliament thla latu AAP MP rorel inkhawmah tel phal lo

Aam Aadmi Party (AAP) MP, Bhagwant Mann chuan kar kalta khan Parliament building chhung video-a thla a lak chu internet lamah a dah chhuak a, hei hi party hrang hrangte chuan an sawisel nasa hle. Parliament building chhung awmdan te, security check leh duty-na laite a tihlan vek avangin Parliament himna a tiderthawng hle nia sawi a ni.

Lok Sabha Speaker Sumitra Mahajan chuan MP Mann hi House rorelnaa tel tawh rih lo turin a hrilh a, a chunga hremna lekkawh dan tur rel a nih hma chuan Lok Sabha inkhawmah a tel an remti lo.

Bhagwant Mann hian kar hmasa khan Speaker hnenah hian ngaihdam dilna a thehlut a, mahse Mahajan-i chuan hei hi a tawk lo tih sawiin, member pakua awmna committee chuan a thiltih hi an chhui chiang dawn a ni, a ti.

Kar kalta Ningani khan Mann hian rorel inkhawma a tel tur Parliament gate a luh aṭanga video-a thla a lak chu a Facebook-ah live-stream in a dah chhuak a, parliament building chhunga security duty te awmna hmun bakah, MP-ten Zero Hour-a sawiho tur zawhna hrang hrang an dahkhawmna room-te a tilang a ni. Parliament hi kum 2001 khan firfiakten an lo bei tawh a, hei vang hian Mann-a video dahchhuah aṭang hian awlsam takin firfiakten building chhung awmdan an hriat theih phah dawn nia sawi a ni. Video hi minute 12 zeta rei a ni a, mahse Zirtawpni khan block sak a ni tawh.

Hetihlai hian AAP chuan a party MP hi a thlavang a hauhsak a, a tihlan tum chu a bialte hnena Parliament member a nih anga an hna thawhte hmuh tir a ni, a ti.

Nimina Parliament in hnih inkhawmah MP Mann chungchang hi sawi≠chhuah ve ve a ni a, MP-te chuan a laka hremna lekkawh ngei an phut a, member-te au beng≠chhen avangin rorel pawh a khaihlak a, inkhawm tihtawp lailawk a ngaih phah a ni. BJP chuan Mann hi MP a nihna
aṭanga ban an phut bawk.