SC-in Vijya Mallya hriattirna pe

Supreme Court chuan sumdawng lian, leiba ngah avanga talbuai mek,Vijya Mallya chu ama hming leh a chhungte hminga a thil neih zawng zawng court-ah hriattir turin a ti.

Vijya Mallya hian a airline tihtawp tak, Kingfisher Airlines hminga bank hrang hrang hnen aṭang loan a lak, cheng vaibelchhe 9,091 a ba mek a ni. State Bank kaihhruai bank 17 intelkhawmte hi Supreme Court-ah an zualko a, mahse hemi hnu hian Mallya hi London-ah kalin tun thlengin India ramah a la rawn kir duh lo a ni.

Mallya hian a leiba hi rulhna atan hian cheng vaibelchhe 4,000 pek phawt a, chumi hnuah thlawhtheihna engine siamtute a khinnaah a chak a nih chuan cheng vaibelchhe 2,000 a pek belh leh a rawt a, mahse a rawtna hi bank intelkhawmte hian a pawm thei lo a ni.

July 15 khan bank intelkhawmte hi Supreme Court-ah hian kal lehin, Mallya hian hriattir a nih angin a thil neih kimchangin a la hriattir lo tih an sawi.

Nimin khan Justice Kurian Jospeh leh Rohinton F Nariman awmna bench chuan Mallya hi amah leh a nupu leh fate hminga thil a neih, khawih chet theih leh theih loh chi zawng zawng pawh thehlut vek turin a ti. Hei hi kar li chhung ngeia tifel turin an ti bawk. Court hian Debt Recovry Tribunal (DRT) chu Mallya loan lak thubuai chungchang ngaihtuah nan hun a pek belh bawk.