BJP dintu zinga mi Jaswant Singh a thi

Union minister hlui leh Bhartiya Janata Party (BJP) dintute zinga mi, Jaswant Singh chu hun rei tak a dam loh hnuah nimin zing khan kum 82 mi niin New Delhi-ah a thi. 

Kum 2014 khan Jaswant Singh hi a ina bathroom-a a chetsual avangin Delhi-a Army (Research and Referral) Hospital-ah dahluh a ni a, he a chetsualna avang hian a luah hliam na tak a tuar a ni. Kum ruk chhung chu damdawiinah hian a lut chhuak ngun hle a, kumin June thla khan a lua hliam kaihhnawih leh multi organ dysfunction sydrome avangin admit a ni leh a ni. 

Damdawi-in chuan thuchhuah siamin, nimin zing khan Singh hian cardiac arrest a neih thu leh, specialist team-ten theihtawpa a nun chhan tuma an beih hnuah an chhan zo ta lo a, September 27 zing dar 6.55-ah thi ta tih a tarlang. 

Indian army major-rank officer-a a pension hnuin, Jaswant Singh hian politics a luhchilh a, politician lar leh langsar ber zingah telin BJP dintu zingah pawh a tel a ni. Atal Bihari Vajpayee kaihhruai NDA sorkar hnuaiah Defence (January 2000 –October 2001), External Affairs (December 1998 –December 2002) leh Finance minister (July 2002 – 2004 May) a lo ni tawh ṭhin a ni. Hei bakah hian Planning Commission-ah Deputy Chairman (1998-1999) a lo ni tawh bawk. 

Kum 1980, 1986, 1998, 1999 leh 2004 khan BJP ticket-in Rajya Sabha MP a lo ni tawh ṭhin a, Lok Sabha-ah term li (1990, 1991, 1996 leh 2009) thlan tlin a ni tawh bawk. Hruaitu hrang hrangte chuan Jaswant Singh an ui thu hi an sawi a, prime minister Narendra Modi chuan a uina thu sawiin, sipai a nihna ang leh, union minister a nihna anga ram tana a rawngbawlna chu India chuan a hrereng dawn a ni, a ti.