Jammu-ah mobile leh internet service hman theih ta

Kashmir Valley-a tualchhung buaina nasa tak chuak avanga ni16 chhung zet mobile leh internet service tihtawp lailawk a nih hnuin, nimin aṭang khan Jammu bial bikah chuan a hman leh theih ta.

Official-te chuan Thawhṭanni zan khan thuneitute chuan thil awmdante an thlir hnuah, Jammu bial bikah chuan mobile leh internet service chhunzawm tawh turin an rel a,Kashmir Valley-ah erawh chuan titawp a la ni rih dawn niin an sawi. Mahse Kashmir Valley-ah hian Bharat Sanchar Nigam Limited (BSNL) post paid hmangin mobile phone chu hman theih a ni dawn a, internet facility erawh pek tel a ni lo ang.

Nimin khan buaina chhuah ṭanna, Anantnag khua tih loh, Kashmir Valley chhunga district hrang hranga curfew puan chu hlih a ni. Hizbul Mujahideen commander Burhan Wani kahhlum a nih vanga buaina chhuakah hian mi 47 in an thih phah a, mi dang 5,500 velin hliam an tuar a ni. Buaina chhuak vang hian July 9 aṭang khan Kashmir Valley-a district hrang hrangah curfew puan a ni.

Central Reserve Police Force (CRPF) Director General K Durga Prasad chuan buaina chhuak tihreh a nih theih nana security force-ten silai mu lem an hman a ngai chu pawi a tih thu a sawi a, mahse kawng dang thlan tur an nei lo tih a sawi. Prasad chuan ralthuamah natna thlen thei lo chi a awm lo tih sawiin, silai mu lem an hmang ang chi chu sipaiten an kawl zingah a hlauhawm loh ber a ni, a ti.

Prasad chuan, "Silai mu lem kahchhuah a nih avanga hliam tuar an awm chu pawi kan ti hle a, keini pawhin a tlem thei ang ber kahchhuah tumin kan bei a ni. Mipui thinrim pungkhawmte kawng hrang hranga thunun kan tumna a hlawhchham hnuah chauh kan hmang ṭhin a ni" tiin a sawi. Silai mu lem avanga hliam tuar an awm chu an mahni ngei pawhin hrehawm an ti hle ṭhin tih a sawi a, mahse hun khirh leh thunun harsa khawp a thlen hunah chuan hman chhunzawm zel a la ngai dawn a, chutiang hun chu a thlen tawh loh a beisei thu a sawi bawk.

Kashmir Valley-a dan leh thupek kengkawh tur hian CRPF company 114 dah an nih thu Pradas chuan a sawi a, heng zinga a tam tak chu training nei lai kohchhuah an ni a, training thlengin a nghawng phah dawn a ni, a tibawk.

Kashmir tualchhung buaina thlen hnuah hian silai mu lem kahchhuah avang hian mi 317-in hilam an tuar tawh nia report a ni a, an zinga a tam zawk chu an mitah fuhin, mitdel phah pawh an awm a ni.