Tribunal-in sorkar laipui thiam loh chantir

Multimedia firm Devas leh Indian Space and Research Oganisation (ISRO) commercial arm Antrix-te contract ziah a tihtawp chungchangah international tribunal chuan sorkar laipui chetdan chu dik lo leh fel lo tiin a sawi. Sum tam tham tak chawi≠tir a ni mai thei.

The Hague-a Permanent Court of Arbitration (PCA) tribunal chuan India sorkarin contract tihtawp a, Devas tan S-band spectrum hman a phal lo chu a tidik lo a ni, a ti. Hei bakah hian India-in Devas hnuaia foreign investor-te ṭha leh dik taka lo dawngsawng tura inremna an siam pawh a bawhchhia niin a sawi bawk.

Devas leh Antrix hian kum 2005 khan inremna siamin, an inremna siam hnuaiah hian Antrix chuan Devas hnenah hian digital multimedia service atan S-Band Spectrum-a 70MHz a pe ang a, hemi atan hian ISRO GSAT-6 leh GSAT-6A satellite-a transponder 90% a hmantir a ni. Mahse kum 2011 khan Space Commission-in he inremna siam hi ram himna dinhmun atan a ṭha lo tia a sawi avangin central-a Congress kaihhruai UPA sorkar hnuaia Cabinet Security on Security (CSS) chuan a titawp a ni.

Mahse kum 2015 khan Devas hian India sorkar thiltih dan chu a dik tawk lo a, hei vang hian Devas Multimedia-a investor-ten sum tam tak an hloh phah nia sawiin international court of arbitration-ah hian thubuai a thehlut ta a ni. Kumin May thla khan ISRO chairman hlui G Madhavan Nair chu he thubuai kaihhnawihah hian CBI-ten thu an zawtfiah tawh bawk. Kum 2005-a Antrix-Devas inremna ziah a nih lai khan Nair hi Antrix governing council hotu a ni.

Tribunal chuan Antrix hian inremna titawp tur hian dikna a nei lo tih sawiin, inremna tihtawp a nih laia ISRO, Antrix and the Space Commission Secretary, Dr KR Radhakrishnan chuan inremna tihtawp tumna pawmsak lo tur hian Cabinet Committe on Security (CSS) pawh a dang thei a ni, a ti.

Hetihlai hian ISRO official-te chuan tribunal thuchhuak kimchang hi an la dawng ve lo niin an sawi thung.