Bawngsa kawla puh Muslim hmeichhiate kut thlak

Madhya Pradesh-a Mandsaur rel station-ah Thawhlehni khan Muslim hmeichhe pahnih chu bawngsa kawlah puhin bawng humhalhtu inti, Hindu pawl pakhat≠in kut an thlak. Kut thlak an nih lai hian police leh thlirtu midang eng emaw zat an awm a, mahse tumahin chhan an tum lo.

Hmeichhe pahnihte bawngsa kawl nia sawi hi doctor enfiah tir a ni a, doctor chuan bawngsa ni loin lawisa a nih thu a sawi.

Rel station-a hmeichhe pahnih kuthlak an nih lai hi a thlirtu pakhat chuan a mobile phone hmangin a lo la a, he thlalak hi thehdarh zui a ni.

Police-te chuan hmeichhe pa≠hnihte hi bawngsa zawrh tur tam tham tak an keng nia thu an dawn avangin an man a, mahse police-ten an man hnuah mipui pungkhawmte hian kut an thlak zui a ni. Darkar chanve vel kut an thlak hnuah police-te hian an hruai sawn chauh niin an sawi.

Hmeichhe kutthlaktute leh police-te laka hian action lak a ni lo a, mahse hmeichhe pahnihte hi sa zawrh phalna an neih loh avangin thubuai siamsak an ni zui tho a ni.

State home minister Bhupendra Singh chuan thil thleng hi chhui chian a ni tur thu a sawi.

Ram chhungah bawngsa chung≠chang avanga inbeihna a thleng fo a, tun hnaiah Gujarat state-ah bawng thata puh Dalit mi pali chu na taka sawisak an lo ni tawh bawk. Nimina Rajya Sabha inkhawmah bawngsa chungchang avanga Dalit leh Muslim-ten beih an tawh dante hi sawichhuah a ni a, eptu MP-te chu House laiah kal khawmin an lungawi loh thu an sawi. BSP hotu, Mayawati chuan Dalit-ten bawng chungchang avanga kut an tawrh hnu lawkah, Madhya Pradesh-a Muslim hmeichhe pahnih kut thlak an ni leh chu a lungawi loh thu sawiin, hmeichhe kutthlaktute chu man ngei tura a phut thu a sawi.

Congress hruaitu Ghulam Nabi Azad pawhin bawng humhalh a ngaih thu a sawi rualin, hemi chhuanlama Muslim leh Dalit-te chunga tawrhna thlen tir chu a duh loh thu sawiin, hetiang thil hi an party chuan an duh lo takzet tih a sawi.