Magsaysay Award dawng turin Indian 2 thlang

Asia khawmuala chawimawina sang bera ngaih, Ramon Magsaysay Award dawng tur zingah India mi pahnih, Bezwada Wilson leh TM Krishna-te chu thlan an ni. Anni pahnih bakah hian midang pali thlan an ni bawk.

Maysaysay Award dawng tura thlan zinga mi, Bezwada Wilson hi Karnataka state-a piang a ni a, India raama mihring hmanga zun leh ek thenfai hnathawk ṭhin tihbo a nih theih nana campaign tu a ni. Safai Karmachari Andolan (SKA) national convenor, Wilson hi mihring zahawmna lakbo sak theih loh lantir tuma beitu a nih avangin chawimawina hi hlan a ni dawn a ni. TM Krishna hi Chennai-a cheng niin, south Indian classical music, carnatic singer a ni. Krishna hi 'Emergent Leadership' caterogy hnuaiah chawimawina hi hlan a ni ang.

Kum 50 mi, Wilson hi Karnataka-a Kolar Gold Fields khuaa dalit chhungkua-a piang a ni a, an chhungkaw zinga higher education kal thleng hmasa ber a ni. A chhungte hi ek paih hna thawk ṭhin an ni. Chawimawina dawng tura Wilson thlan a nihna thu ziakah chuan, "India ramah kut hmanga mihring ek paih hna hi thawh a la ni reng a ni. Untouchable tia sawi, dalit-te chuan ek paih hna hi thawkin, a paihna hmun siamah ṭin-ten an paih ṭhin a ni. He hna thawk mek hi dalit mi 1,80,000 vel an awm a, India ram hmun hrang hranga public leh private ek-in 7,90,000 te an thianfai ṭhin. Ram danpui leh dan dangte pawhin kut hmanga ek-in thenfai hna thawh hi khap mah se, he dan hi kenkawh a ni lo a, sorkar ngei pawh dan palzuttu lian ber a ni" a ti. He hna tihbo a nih theih nan leh, Dalit hnam zahawmna chawinung tura Wilson-a hmalaknate chu board of trustees chuan hriain, chawimawina dawng tur hian an thlang ta tih an sawi.

Chawimawina dawng tura thlan dang, Krishna hi kum 40 mi a ni a, music chu khawtlang nun leh mimal nunah nghawng lian tak a nei thei a ni tih a lantir avanga thlan a nih thu tarlan a ni. Chenai-a Brahmin chhungkua-a piang, Krishan hian kum ruk mi a nih avangin Carnatic music hi a zir a, economics lamah degree nei mah se, Carnatic classical music hi eizawnna atan a thlang ta zawk a ni.