Kum 2050-ah khawpuiah mipui 60% cheng dawn

Minister of State for Urban Development, Rao Inderjit Singh chuan nimina Lok Sabha inkhawmah India mipui 60% chu kum 2050-ah chuan khawpuiah an chen rin a nih thu a sawi.

Minister chuan kum 2011 census-ah ram chhung mipui 31% chu khawpuiah an cheng a, kumtinin khawpuia lut hi an pung zel a ni, a ti. "Khawpuia lut an pun zel avang hian kum 2050-ah chuan ram mipui zinga 60% chu khawpuiah hian an cheng tawh dawn a ni" a ti. Hei vang hian khawpui lian leh te deuhte chei leh thuamna tura sorkar laipui ruahmanna siam, Atal Mission for Rejuvenation and Urban Transformation (AMRUT) chu a thawh hnihna aṭangin chak zawka kalpui a nih tur thu a sawi.

He mission hnuaiah hian khawpuia water supply, septage, storm-water drainage, urban transport, park leh green space siamna turin ruahmanna siam a ni.

Singh chuan AMRUT hnuaia hnathawhna hrang hrangah hian World Bank emaw, foreign financial institution emaw puihna an dawng lo tih sawiin, central sorkar bakah state leh union territory sorkarten an tum vek a nih thu a sawi bawk.