Rajnath Singh-an Pakistan a tlawh dawn

Union Home Minister Rajnath Singh chu August 3-4 khian South Asian Association for Regional Cooperation (SAARC) home/interior minister meeting hmang turin Pakistan-ah a zin dawn.

Minister hian meeting neih hunah hian India-Pakistan ramri-a firfiakte chetna thleng ṭhin chungchang pawh sawichhuah a tum nia tarlan a ni.

Kum 2005, November thlaa Dhaka-a SAARC Summit vawi 13-na neih a nih ṭum khan, ram hrang hrang hotute chuan firfiakte beihletna kawnga member ramte thawhhona ṭha zawk a awm theih nan SAARC interior/home minister meeting hi kumtin neih an lo rel tawh a ni. Minister meeting neih hma hian interior/home secretary meeting neih rawt a ni bawk.

SAARC interior/home minister meeting hmasa hi kum 2006, May 11 khan Dhaka-ah neih niin, kum 2007-ah New Delhi-ah neih a ni bawk.

Tun ṭum meeting neih tur hi Kashmir tualchhung buaina thleng mek chungchang vanga India leh Pakistan inkar boruak chhiat lai a ni. July 8-a Hizbul Mujahideen commander Burhan Wani kahhlum a nih avangin Kashmir Valley-ah buaina nasa tak a chhuak mek a ni. Paksitan chuan Kashmir buaina thleng chungchanga India ram hotute an demna thu an chhakchhuak a, July 20-a buaina chhuaka civil mi eng emaw thihna thleng duh lohna lantirin an ramah 'black day' an hmang. Hei hi sorkar laipui chuan na taka sawiselin, Pakistan chu India ram inrelbawlnaa inrawlh leh firfiaka chetna thlawpah a puh let a ni.