Vanglaini logo

Lok Sabha panel hmaah Bhagwant Mann inlan

Aam Aadmi Party MP, Bhagwant Mann chu a Facebook-a Parliament building chhung awmdan video a tihchhuah avangin Parliament himna tiderthawngah puh a ni a, a chungthu hi ngaihtuah a nih hma chuan Lok Sabha rorel inkhawmnaah pawh a ṭhut khapsak a ni.

MP Bhagwant Mann chungchang ngaihtuah tura ruat, Lok Sabha panel chuan nimin khan insawifiah turin MP hi a ko a, a ukilin a ṭawiawm dawn a ni.

July 21 khan AAP MP hian Lok Sabha rorel inkhawma a tel tur chu a in aṭanga Parliament chhung a luh thlengin video-a lain, a video hi a Facebook-ah a dahchhuak a ni. Video-ah hian parliament chhunga security system kalpui dante a lan vek avangin sawisel a tawk nasa hle. Party hrang hrang MP-te chuan a laka action la ngei turin an phut a, Lok Sabha Speaker Sumitra Mahajan-i chuan panel-in thil awmdan a chhui zawh hma chu rorel inkhawmnaa tel tawh lo turin a ti ta a ni.

  • July 21 AAP MP Bhagwant Mann-an a chenna in aṭanga Parliament chhung a luh thleng video-a a lak chu a Facebook-ah a dahchhuak.
  • July 22 Lok Sabha leh Rajya Sabha rorel inkahwmah BJP, Congress leh Akali Dal-te chuan MP Mann-a thiltih chungchang hi sawichhuakin, Parliament himna tiderthawng nia sawiin a laka action lak an phut.
  • July 22 Mann chuan a Facebook aṭangin a video hi a paih a, Speaker Sumitra Mahajan-i hnenah ngaihdam a dil. Mahse Speaker chuan a ngaihdam dilna hi a hnawl a, thil awmdan chu ngun taka chhui chian a nih tur thu a sawi.
  • July 25 Mahajan-in Mann-a thiltih chungchang enfiah tur hian party hrang hranga MP pakuate awmna committee a din. Mann chu a chungthu ngaihtuah fel a nih hma chu House-a kal tawh lo turin a ti. Tlaiah panel hian meeting an nei nghal.
  • July 25 Mann chuan press conference koin, BJP, Akali Dal leh Congress party chetdan chu amah tihchhiat tuma phiarrukna niin a sawi.
  • July 26 Panel chuan Delhi police hotu Alok Kumar Verma a ko a, Lok Sabba-a watch and ward division chungchang an zawtfiah.
  • July 26 Mann chuan security dan palzuta puh a, thiam loh chantir a nih chuan, Prime Minister Narendra Modi pawh Pathankot beihna chungchang a hmuna enfiah tura Pakistan intelligence agency, ISI mi leh sate an kal a phalsak avangin hrem a ni ve tur a ni, a ti.
  • July 27 Panel chu inhmukhawm lehin, junior security officer-te thu an zawtfiah.
  • July 28 Mann chu a ukil nen panel hmaa inlan tura koh a ni.