Modi hian min tihlum duh mai ang : Kejriwal

Aam Aadmi Party hotu, Delhi Chief Minister Arvind Kejriwal-a chuan nimin khana Face≠book account-a video a dahchhuahah, an party MLA zawng zawngte chu Prime Minister Narendra Modi-an jail-ah a la dah duh vek ang tia sawiin, inring turin a hrilh.

Kejriwal-a chuan PM Modi leh BJP president Amit Shah-te chuan politics lama phuba lakna atan amah leh an party member-te thah duh hial khawpin an che duh mai ang, a ti. A Facebook-a video a dahchhuah hi minute kua-a rei a ni.

Delhi CM chuan an party tihchhuah tuma phiarrukna lian tak a awm mek a ni tiin, hei vang hian an party MLA-te chu jail-a tang thei tura inpeih reng turin a chah.

Nilaini khan AAP MLA Karatar Singh-a chenna in chu Income Tax official-ten an dap a, hemi ni vek hian MLA Sharad Chauhan chu AAP volunteer Soni intihhlum chungchangah police-ten thu zawhfiah turin an hruai bawk.

Pathianni aṭang khan AAP MLA pahnih man an ni tawh a, MLA Rajesh Rishi, Delih Commission for Women chief Swati Maliwal leh AAP youth wing chief Aman Dabas-te lakah FIR ziahluh niin, AAP MP Bhagwant Mann chu hrem mek a ni bawk. AAP-in thuneihna a chan aṭanga kum khat leh a chanve chhungin, an party MLA 11 chu judicial custody-ah thawn an ni tawh a ni.

Delhi CM chuan PM Modi chu beiin, "I hmanraw hrang hrang - CBI, Delhi Police, ACB leh Income Tax-te chu kan MLA-te lakah i hmang a, mahse Pu Modi, engmah kan hlau lo a ni" a ti. AAP leh sorkar laipui inbeihna chu a na tial tial dawn a, hemi atan hian an party MLA-te pawh inbuatsaih turin a chah. "In vaiin thil awmdan hi in chhungte sawipui rawh u. Anni ho hi eng ang pawhin an che duh a, mi that hial mai thei a ni. Engpawh an tih duh avangin kei ngei pawhin min tihhlum duh mai ang" a ti.