Bengal doctor-ten nawrh ti tawpin hna an zawm dawn

West Bengal chief minister Mamata Banerjee-in doctor lungawi lote phut anga senior police leh health official-te sawn leh ban a tiamna a tihhlawhtlin hnu leh, healthcare hnathawkte himna tura ruahmanna a siamte a tih chhuah hnuah, doctor-te chuan vawiin aṭangin nawrh chu ti tawpin an hna an zawm tawh dawn tih an sawi.

Doctor-te chuan an nawrh tihtawp hi a ṭhen chauh a ni tih sawiin, Out Patient Department (OPD) lam hna erawh thawh chhunzawm an la tum rih lo tih an tarlang.

Nimin, September 20 khan doctor-te hian Kolkata-a CBI office thleng kawng zawhin, state health department headquarters kawtah sit-in protest an huaihawt chu a tawpna an siam a ni. Doctor te chuan 'dikna duha an beihna' chu a la tawp mai dawn lo tih an sawi.

August 9-a RG Kar Medical College and Hospital-a doctor zirlai pawngsual leh thah a nih hnuah doctor-te hian nawrh huaihawtin, ni 38 chhung an hna thawk loin lungawi lohna hi an lantir a ni. Tun ṭumah hian an nawrh hi titawp mah se, a ṭul a nih chuan nawrh hi chhunzawmin, an hna pawh an chawl leh ang tih an sawi zui bawk.

West Bengal Junior Doctors’ Front chuan RG Kar Medical College and Hospital-a pawikhawihna rapthlak tak thleng ang hi a thlen nawn tawh lohna tura hetianga hma la an nih thu an sawi a, sorkar pawhin an hma lakna hi a tawp angin ngai lo se an duh tih an tarlang.

CBI-in TMC ṭhalai hruaitu thu zawtfiah

Central Bureau of Investigation (CBI) chuan Ningani khan Trinamool Congress(TMC) Ṭhalai hruaitu, Ashish Pandey chu RG Kar Medical College thubuai kaihhnawihah thu an zawtfiah. Pandey hi RG Kar Medical College ah hian house staff hna a thawk a ni.

Pandey hi darkar eng emaw zat chhung CBI hian Central Government Office Complex-ah zawhna an zawt a ni. CBI Officer chuan, "Pandey phone number hi mi eng emaw zat call list-ah a lang a, pawikhawihna thlen zanah khan zan lai ah chhuakin Salt Lake-a hotel pakhatah a hmeichhe ṭhian nen an riak a, hemi kaihhnawihah hian a thil tih leh awmdan hi pawikhawihna nen inzawmna a neih leh neih loh kan zawtfiah a ni," tiin a sawi.

CBI chuan hotel neitute hnenah hian Pandey an booking leh payment a tihna kimchang te dilin, "Hotel chu app hmanga a book niin, August 9 chawhnu lamah a lut a, a tuk zingah a chhuak leh nghal a, hotel-a a riah chhante chu hriat chian kan tum," an ti.