Congress-in Rahul leh Priyanka Gandhi te tan venhimna khauh zawk ngiat

Congress party chuan Union Minister Ravneet Bittu leh NDA hruaitu dangte thusawi dan avangin Rahul Gandhi leh Priyanka Gandhi Vadra te unau tan venhimna khauh zawk, Special Protection Group (SPG) security pek an ngiat.

AICC national spokesperson Kuldeep Rathore chuan, Bittu thusawi, "Rahul hi a pi, Indira Gandhi dinhmun ang kha a chungah a thleng ve thei," ti a sawi leh, BJP chet dante aṭang chuan Rahul Gandhi leh Priyanka Gandhi tan hian venhimna khauh zawk pek ngei an ngai a ni, a ti. Indira Gandhi hi amah vengtu Sikh in kaphlumin, Rahul-a pa, Rajiv Gandhi pawh thah a ni bawk a ni.

Rathore chuan BJP hian eng vanga Bittu chu minister atana ruat nge an ni tih zawtin, BJP chu Rahul Gandhi tana boruak muanawm lo tak thlenah a puh bawk. Bittu chu a thusawi avang hian ngaihdam dil turin a phut bawk.

Nilaini khan Congress hruaitu, Ajay Maken chuan union minister Ravneet Singh Bittu lakah hian Lok Sabha Leader of Opposition chungchanga a thu sawi dan avang hian Tughlaq Road Police Station-ah thubuai a theh lut bawk a ni.

Maken chuan, Congress party chu inthah a vau zam mai mai theih an nih loh bakah, an hruaitu pawh chu ngawih tir an nih loh tur thu sawiin, Bittu thusawi chungchanga BJP an ngawi reng leh, an dem thu an sawi chhuak lo chu na takin a sawisel zui bawk. BJP hruaitu dang pakhat pawhin Rahul Gandhi lei tansaktu hnenah Rs nuai 11 lawmman pekte a tiam thu a tarlang bawk.