March 2026 hmain Naxalism tih tawp tum - Amit Shah

Union home minister Amit Shah chuan nimin, Zirtawpni khan Maoist helte chu pawikhawihna an thlen ṭhin ti tawp a, an ralthuamte daha inpe turin a ngen. Naxal helna chu March 31, 2026-ah nuaibo tum a nih thu a sawi bawk.

Naxel helte pawi­khawihna thlen tuartute tana thu a sawiah, Amit Shah chuan, "Prime Minister Narendra Modi chuan Naxal pawikhawihna leh an thuthlungte chu ram chhung aṭanga nuaibo vek a tum a ni. Hemi atan hian March 31, 2026 a ruahman a, mahse hemi thlen hma hian Naxal hi kan nuaibo hman ngei ka beisei," a ti.

Ghandhinagar MP chuan sawi belhin, venhim hna thawktute chuan Maoist-te laka beihpui an thlaknaah hlawhtlinna an hmu zel tih a sawi a, tunah chuan Chhatisgarh-a district pali-ah chauh harsatna hi a awm tawh niin a tarlang. Maoist helhoin Pashupatinath (Nepal)-Tirupati (Andhra Pradesh) inkalpawhna tur siam an tum pawh Narendra Modi kaihhruai sorkar laipui chuan a tih chhiat sak niin a sawi bawk.

Union Home Ministry chuan Naxal hel hluarna state, Chhattisgarh mipuite chhawmdawlna tur chu state sorkar nena thawk dunin an ruahman thuai dawn tih Shah chuan a sawi. "Kan theih na kawng hrang hrang heng hna thawh tur siam, healthcare leh thil dangahte welfare scheme kaltlang in puih in ni ang," a ti.

Kumin chhungin security force-te chuan Naxal hel laka beihpui an thlaknaah hel 164 an kap hlum tawh a ni.

South Asia Terrorism Portal (SATP) in a tarlan danin, Maoist 164 zinga 142 te chu Chhatisgarh huam chhungah kumin kum chanve chhunga thah niin, thihna thlenna zinga 90% hi Chhatisgarh-a Khairagarh-Chhu­khandan-Gandai district a thleng a ni.