Kissan Rally-ah Rahul Gandhi a inlan

Congress party huaihawtin nimin khan BJP kaihhruai NDA sorkarin Land Acquisition Bill a siam danglam duh lohna lantirin loneitute pualin Delhi-a Ramlila Maidan-ah Kissan Rally huaihawt a ni a, he hunah hian hun rei tak chawlh laa awm bo, Congress vice president Rahul Gandhi pawh inlanin, thu a sawi.

Kissan Rally-ah hian Rahul bakah Congress president Sonia Gandhi, Prime Minister hlui Manmohan Singh te pawhin thu an sawi.

Prime Minister Narendra Modi-a kaihhruai NDA sorkar­in land bill a siam dang­lam dan hi eptu party hrang hrang bakah, NDA hnuaia BJP thawhpui party ṭhenkhat pawhin an sawisel a ni.

Congress Vice President Rahul Gandhi chuan PM Modi-a sorkar chu mirethei leh loneitute duhsak loah a puh a, mi hausa leh sumdawng lian­te duhsak leh ṭhatna turin a thawk a ni, a ti. Loneitute tan theihtawpin a bei zel dawn tih sawiin, Rahul Gandhi chuan PM chuan Lok Sabha inthlan­pui neih dawna sumdawng liante hnen aṭanga sum a puk rulhna atan mi rethei zawk leh loneitute ram chu chhuhsak a tum a ni, a ti.

Congress kaihhruai UPA sorkarin loneitute hamṭhatna tura scheme a siam leh hma a lak dan hrang hrangte sawi­chhuakin, Rahul chuan, "Congress chuan in tan indona a hmachhawn sak dawn che u a, kan hneh ngei ang. In tan ka ding zel dawn a ni," tiin a sawi.

"UPA in sorkarna a siam lai khan, a theih ang angin loneitute ṭanpuina turin hma a la ṭhin. Leiba avanga harsatna tawk loneitute chhanchhuahna turin scheme-te a siam a, wheat leina man pawh Rs 540 aṭangin Rs 1400-ah a tisang a, UPA sorkar khan loneitute'n loan ba cheng vaibelchhe 70,000 pawh a lo ngaihdam sak tawh a ni," a ti.

BJP sorkarin loneitute duhsak lo zawnga land acquisition bill siam danglam a tum danah zawhna siamin, Rahul chuan, "Land Bill 2013 siam tur hian kum hnih kan hmang a, hetihlai hian BJP pawhn min thlawp a ni. Tunah eng vangin nge an thlak danglam? Engvangin nge Parliament kaltlanga pass lo a, Ordinance-a a siam?" a ti.

Land Bill siam danglamna tura thil fel tawk lo awmte sawichhuakin, Congress hruai­tu chuan loneitute chuan an ram laksak an nih manah hna engmah hmuh tur an nei dawn lo tih a sawi. "Loneitute chu hnathawktu chhawr leh chhiah­hlawh ang maia en kan phal lo a ni," tiin a sawi. Modi-a'n Canada ram a tlawhnaah eptu pawlte a beih dan chu sawisel­in, Rahul chuan, "Modi-a'n kum 50 bawlhhlawh awm a thianfai dawn tia a sawi chu pawi ka ti hle a ni. A ṭawngkam hmante chu Modi emaw, PM post chelh lai emaw tana tih chi a ni lo," a ti. Modi-a'n 'Make in India' campaign a kalpui mek pawh bei letin, he thil hi Modi-a duhthusam a ni a, a hlawhtling tak tak lo ang, a ti bawk.