US-a ka thusawi chungchangah BJP in dawt thehdarh: Rahul

Lok Sabha Leader of Opposition, Congress party hruaitu Rahul Gandhi chuan tun hnaia US a tlawh ṭuma sakhaw zalenna lam hawi sawia, Sikh chungchang a sawi danah BJP chuan thu dik lo leh belhchian dawl lo an thehdarh niin a sawi.

BJP chuan thu dik tak sawi chhuah chu an pawm theih loh avangin dawt hmanga a ka hupsak an tum niin Gandhi chuan a puh a ni.

Gandhi chuan hemi chungchang hi a X-ah tarlangin, "BJP chuan America ka tlawhnaa ka thu sawi chungchangah dawt an thehdarh a ni. India leh ram pawna Sikh unaute hnenah, ka thusawi danah khan thil dik lo a awm em tih pawh ka zawt duh a ni. India ram chu mi zawng zawng, Sikh mite pawh huam vekin, zalen tak leh hlauh nei loa an sakhaw rinna an kalpui theihna tur a ni dawn lawm ni?" a ti

Washington DC-a September 10 Indian-America mite hmaa thu a sawiah Gandhi chuan," A hmasa berin eng nge kan do hriat thiam a, politics lam inbeihna a ni lo tih hi in hriat ka duh a ni," tiin, Sikh chu India ramah a turban khum phalsak a ni em, 'kada' hak phalsak a ni em, tih leh gurudwara-ah kal phalsak a ni em tih chu entirna atana hmangin, hei hi sakhaw tin ten zalenna an neih theihna tura an beih chungchang sawina atan a hmang a ni.