Congress-in Kangana Ranaut beih letah vau

Himachal Pradesh Congress chuan BJP MP Kangana Ranaut-in state sorkar chuan hmasawn hna thawhna tura fund a dawnte Sonia Gandhi hnena pek turin a pawtpeng ṭhin nia a sawi chungchangah, ngaihdam a dil loh chuan a laka defamation case thehluhah an vau.

Kangana hian Pathianni khan, "Himachal Pradesh sorkar in an loan puk chu Sonia Gandhi hnenah pe in, hei hi state chuan a tawrh phah" tiin a sawi a, Manali-a BJP programme-ah, "Sorkar laipuiin chhiat tawk chhawmdawlna kan pek reng reng chu CM relief Fund ah a lut mai ṭhin a mahse, hei hi Sonia Gandhi Relief Fund ah a lut hmasa zel a ni" tiin a lo sawi tawh bawk.

Congress Minister Vikramaditya Singh chuan Kangana thusawi te chu na taka chhangletin, "thusawi atthlak" a siam hian finna a tlakchhamzia a lantir a ni, a ti. "Central aṭanga hmasawnna tura state tana fund lo kalte Sonia Gandhi hnenah pek a ni tih aia thusawi atthlak dang hi a awm thei lo ang," tiin a sawi.

Kangana Ranaut hian a hma pawhin sawi zui hlawh tak thu a lo sawi fo tawh. August thla khan loneituten nawrh an huaihawtnaah pawngsualna leh inthahnate a thleng a, BJP hruaitute an chak tawk loh chuan tualchhung buaina nasa tak thlenna, Bangladesh ram dinhmun angah a chang thei dawn niin a sawi tawh a ni. Mahse a thusawi chungchangah hian BJP ngei pawhin an khak zui nghal a, party ngaihdan ni loin a mimal ngaihdan a ni tiin, a ngaihdan chu an pawmpui loh thu pawh an sawi zui nghal a ni.