Kerala-a Mpox vei hri kai Clade 1b strain a ni tih hmu chhuak

Kerala-a Mpox vei hmuh tawh chu kaichhawn leh ṭai darh awlsam, World Health Organisation (WHO) in khawvel huapa public health emergency a puanna chhan, Clade 1b variant a ni tih Thawhṭanni khan hmuh chhuah a ni.

He dam lo, kum 38 mi hi UAE aṭanga rawn haw niin, kar liam ta khan Mpox a vei tih hriat a nih avangin government medical college hospital-ah dah nghal a ni. Damlo hi a dinhmun a ṭha a, mahse damdawiinah hian enkawl chhunzawm mek a la ni. Official-te chuan Thawhṭanni khan a hri kai hi Clade 1b variant a ni tih hriat a nih thu sawiin, India ramah he variant kai hmuh hmasak ber a nih thu an sawi bawk.

State thuneitute chuan thil awmdante uluk taka thlithlai zui nghalin, damlo nena in hnimhnai zawng zawng te chu contact tracing an neih nghal thu an sawi. Kerala health minister Veena George chuan rampawn aṭanga rawn haw te chuan an taksa ah symptoms a lang a nih chuan heatlh department-ah inhriattirin, a rang thei ang bera an inenkawl nghal a ṭul thu a sawi. District tinah damlo enkawlna tur hi buatsaih a ni a, airport-ah pawh uluk zawkin enfiah hna hi thawh a ni, a ti.

Mpox vei an hmuhchhuah hmasak zawk chu Delhi ah niin kum 26-a upa Haryana Hisar-a cheng a ni a, a hri kai hi West African Clade 2 zawk a ni. Delhi-a Lok Nayak Jai Prakash Narayan Hospital-ah September 8 khan dah luh niin, September 21 ah dam takin a chhuak leh tawh a ni.

Union Health Ministry chuan State leh Union Territories te hnenah thurawn pe thar lehin, Mpox hri kai nia rinhlelh te chu an hnu chhui te, screening , testing leh ṭul dang pawimawh te buaipui zung zung turin a ngen. State tinte chu damdawiinah natna hri kai nia rinhlelh leh finfiah tawhte inkhunghranna tur siam a, district huam chhunga health facility-te pawh nasa taka lo inpuahchah a ṭul thu a sawi.

August 14, 2024 khan WHO chuan Democratic Republic of Congo leh aṭhenawm Africa ramte a nasa taka Mpox hri darh vak vangin kum hnih chhunga a vawi hnihna atan khawvel huapin public emergency a puang a ni.