Budget session vawi 2-na nei

Parliament Budget session chu hun eng emaw chen chawlh lailawk a nih hnuin, nimin aṭang khan a thawh hnihna chhunzawm a ni.

Session thawh hnihna ṭanni hian vun rawng chungchanga union minister-in Congress President Sonia Gandhi a sawi dan avangin member-te an in au buai a, inkhawm tihtawp lailawk a ngaih phah a ni.

Congress hruaitu Jyotiraditya Scindia chuan tun hnaia Union Minister Giriraj Singh-a'n Congress President, Sonia Gandhi vun rawng chungchanga a ṭawngkam hman mawi lo tak leh, Shiv Sena hruaitu Sanjay Raut-a'n Muslim-te chungchanga a sawi dan a sawichhuak.

Parliamentary Affairs Minister Venkaiah Naidu chuan Giriraj Singh-a chungchang hi chhangin, a thusawi dan chu ṭha an ti lo a, sorkar lamah pawh tu mahin Singh hi an thlawp lo a ni, a ti. Congress hruaitu Mallikarjun Kharge chuan, "Giriraj Singh hi union minister a ni a, council of minister hotu chu Prime Minister a ni, chu vangin hemi chungchangah hi chuan PM hi a ṭawngchhuak tur a ni," tiin, eptu pawlte chuan PM chu a minister thusawi avang hian thupha chawi turin an phut a, minister hi bang turin an phut bawk.

Giriraj Singh hian tun thla tir lam khan Sonia Gandhi hi vun ngo a nih vang maia Congress-in an hruaitu atana pawm thei tih lam hawiin a sawi a, "Rajiv Gandhi khan Nigeria mi nupuiah lo nei ni ta se, Congress hian an pawm thei ang em?" tiin a sawi a ni.

Scindia chuan minister thusawi hi ramchhunga hmeichhiate hmusitna chauh a ni lo a, ram pum leh Nigeria mite hmusitna a ni, a ti.

Giriraj chuan a thusawi avang hian thupha a chawi bawk a, "Midang rilru tihnat tuma sawi ka ni lo a, mi rilru ka lo tina a nih chuan pawi ka ti takzet a ni," a ti.

Minister thusawi demna thu sawia eptu member-te aubuaina karah, External affairs minister Sushma Swaraj-i chuan Yemen tualchhung indona thleng vang­a Yemen aṭanga India mite chhanchhuah a, hruai haw an nih dante a report a, hei bakah hian Rajiv Pratap Rudy chuan land acquisition amendment ordinance a pharh bawk.

Eptute chuan land bill siam danglam tum chungchangah Congress vice president, Rahul Gandhi chu loneitute tana harsatna a thlen dan turte, tun hnaia ruah­sur dan dik lo vanga loneituten buaina an tawh mek dante sawi tir turin an phût a, Rahul Gandhi hi parliament-a thu sawi phalsak a nih loh chuan house aṭang chhuah tauh-ah an vau bawk.