Bhushan-a'n party hriattirna a chhang

Delhi-a rorellai, Aam Aadmi Party (AAP) hruaitu hel pahnih, Yogendra Yadav leh Prashant Bhushan-te chu kar kaltaa party kalphung kalha, non-political group Swaraj Abhiyan (self-rule campaign) an din avangin party thuneitu sang chuan insawifiah turin hriattirna a lo pe tawh a ni.

Prashant Bhushan chuan nimin khan party-in show cause notice a pekna hi chhangin, party kal dan phungah ngaihdan dang neih ringawt chu code of conduct palzutna a ni lo, a ti.

Bhushan chuan, "Office bearers ni lo member dangte chuan party chhung leh pawnah an ngaihdan leh thlir dante sawi turin an zalen a ni. Party thil tum dodal zawng a ni loh chuan ngaihdan hrang lo neih ringawt chu dan kalh a ni lo," tiin a sawi.

AAP Secretary Pankaj Gupta chu bei let nghalin Bhushan chuan, "Pankaj Gupta, Ashish Khetan leh Dinesh Vaghela-te chuan National Disciplinary Committee tia inchhalin he hriattirna hi min rawn pe a, he committee hi tu din leh eng tik a din nge, eng vanga din nge tih pawh ka hre lo a ni," a ti. Gupta ngei pawh hi party Political Affairs Committee pawmpui lohin, company aṭang donation cheng vaibelchhe 2 dawngah puh a nih tawh thu a sawilang. Journalist hlui, Ashish Khetan chu kum 2012 khan Tehelka-ah Essar Company hum tuma thu ziakah a puh a, company hian Tehelka hnenah hian sum tam tak a pe a ni, a ti.

AAP hruaitu Ashutosh chuan Bhushan chu amah leh amah chu mi nuihzabur­ah a insiam a ni tiin, an party hruaitu a puhnate chu finfiahna a pe thei lo a nih chuan thupha chawi turin a phût.