India hi hmelma number one a ni : Hafiz Saeed

26/11-a Mumbai khawpui beih a nihna a ruahmantu bera puh, Pakistan firfiak pawl Jamaat-ud-Dawa (JuD) hotu Hafiz Saeed chuan nimina Pakis­tan-a rally a huaihawtah, India chu Pakistan hmelma number one a ni tih sawiin, Jammu and Kashmir-a India lak aṭanga inlakhran duhtu pawlte a thlawp thu a sawi.

Peshawar-a Saeed-a rally huaihawt­ah hian Pakistan-a rorel lai, PML(N) MP-te pawh an tel.

Pakistan Channel 24 in a kawmnaah, Saeed chuan Kashmir-a India dodal a, inlakhran duhtute a thlawp thu a sawilang bawk a, "Kashmir-ah chuan mi tam tak zalenna duh an awm a ni. Heng mite hi India sorkarin a bei a nih chuan keini pawhin na takin kan chhang let ang. Pakistan sorkar leh Pakistan sipaite'n Kashmir-a zalenna nei lo mipuite an puihna hi kan thlawp tlat a ni," a ti.

Saeed hi India most wanted list-ah leh, NIA list-ah telh mek a ni a, India rama vawi tam tak pawikhawihna thlentua puh, Lashkar-e-Taiba nen pawh inzawmna ṭha tak neia puh a ni bawk.