Kum 10-a upa motor hman khapna ennawn tura ngenna hnawl

Supreme Court chuan National Green Tribunal (NGT) in Delhi khawpui chhunga diesel motor, kum 10 china upa tlan tir khapna dan a siam tawh ennawn tura ngenna, private party thehluh chu nimin khan a hnawlsak.

NGT hian diesel hi Delhi khawpui boruak tibawlhhlawhtu lian tak a ni tih sawiin, April 7 khan diesel hmang motor, kum 10 chin leh, petrol hmang motor kum 15 chin chu Delhi-NCR huam chhungah tlan a khap a ni.

Motor tlan thei chin khuahkhirhna siam hian khawpui huam chhungah private vehicle 1,18,773 leh commercial vehicle 34,659 a nghawng dawn a ni. Delhi-ah hian nitin motor nuai 5 vel an tlanlut a, heng zingah hian truck 50,000-70,000 leh state transport bus 2,500 vel an tel. Hengte hi diesel hmang vek an nih avangin khapna dan siam hian a nghawng nat hle rin a ni.