Bihar inthlan neih hun tur puang

Chief election commi­ssioner (CEC) Sunil Arora chuan nimin khan Bihar assembly inthlan neih hun tur a puang. 

Inthlan hi thawh thuma neih a ni dawn a; October 28, November 3 leh 7-ah vote thlakin, November 10-ah vote chhiar a ni ang. October 28-a inthlan thawh khatna neih turah hian district 17-a assembly constituency 71-ah vote thlak a ni dawn a,  a thawh hnihnaah district 17-a bial 94 leh a thawh thumnaah district 15-a bial 78 ah vote thlak a ni ang. 

Arora chuan hripui leng vangin inthlan neih tur atan pawh hian fimkhur taka hma lak a ni dawn tih sawiin, Maoist hluarna bial tih lohah chuan vote thlak tura mipuite inhnawhkhawm tihziaawmna turin vote thlak hun hi darkar khata pawhsei vek niin, zing dar 7 aṭanga zan dar 6 thleng vote thlak theih a ni dawn tih a sawi. 

CEC chuan inthlan neih tur atan hian social media platform hrang hrangte chu an platform-te dik lo taka hman a nih lohna tura ruahmanna fel fai tak siam tur leh, thil dik lo titute hremna tur kaihhruaina khauh tak pawh siam tura beisei an nih thu a sawi. 

Arora chuan inthlan hunah hian Covid-19 kai leh khung hran mekte pawh vote an thlak phalsak vek an ni dawn tih a sawi. Health department thuneitute enpuina hnuaiah vote thlak tawp ber niah  polling station-ah vote an thlak thei dawn a ni. Hei bakah hian an duh zawk chuan postal hmangin vote an thlak thei bawk ang. 

Bihar Legislative Assembly term kal mek hi November 29 hian a tawp tawh dawn a ni. Seat 243 awm zingah  seat 38 chu SC tan dah niin, ST tan seat hnih dah a ni bawk.  Chief Election Commissioner chuan inthlan neih tur chungchang hian Bihar-a CEO pawh ṭum tam tak sawipui a ni tawh a, hri leng kara inthlan buaipui dan tur ruahmannate pawh siam a ni, a ti. 

Inthlan buaipui turte leh vote thlakna hmuna mamawh tur te pawh ngaih­tuahin, sanitizer nuai sarih, mask nuai 46, PPE kits nuai ruk, face shield nuai 7.6 leh hand glove nuai 23 ruahman a ni dawn a ni, a ti.